వాజ్ పేయి ఆరోగ్యం విష‌మం ఆందోళ‌న‌లో బీజేపీ వ‌ర్గాలు

414

మాజీ ప్రధాని, భారతీయ జనతా పార్టీ సీనియర్ నాయకుడు అటల్‌ బిహారీ వాజ్‌పేయి ఆరోగ్య పరిస్థితి మరింత విషమించింది. ఢిల్లీలోని ఎయిమ్స్ ఆసుపత్రిలో చికిత్స పొందుతున్న ఆయనకు వైద్యులు రెండు రోజుల నుంచి వెంటిలేటర్ ద్వారా కృత్రిమశ్వాస అందిస్తున్నారు. అయితే బుధవారం సాయంత్రం ఆయన పరిస్థితి మరింత విషమంగా మారిందని ఈ మేరకు ఆసుపత్రి యాజమాన్యం హెల్త్‌ బులెటిన్‌ విడుదల చేసింది.

వాజ్‌పేయి ఆరోగ్య విషయం తెలియగానే ప్రధానమంత్రి మోదీ సాయంత్రం 7.30 గం.ల ప్రాంతంలో ఎయిమ్స్‌కు వచ్చారు. వాజ్‌పేయిని పరామర్శించిన ప్రధాని, ఆయనకు వైద్యం అందిస్తున్న వైద్యులను అడిగి వాజ్‌పేయి పరిస్థితి గురించి వాకబు చేశారు… బీజేపీ జాతీయ అధ్యక్షుడు అమిత్‌ షా కూడా ఎయిమ్స్‌కు వెళ్లి చికిత్స పొందుతున్న వాజ్‌పేయిని పరామర్శించారు… ఆయన ఆరోగ్య పరిస్థితిని, అందిస్తున్న వైద్య సదుపాయలను స్వయంగా అడిగి తెలుసుకున్నారు… కేంద్ర మంత్రి స్మృతి ఇరానీ సైతం ఎయిమ్స్‌కు చేరుకున్నారు.

మూత్ర సంబంధిత సమస్యలతో డయాబెటిస్‌తోపాటు డిమెన్షియా బాధపడుతున్న వాజ్‌పేయి ఆరోగ్యం విషమించడంతో జూన్‌ 11న ఎయిమ్స్‌లో చేరిన సంగతి తెలిసిందే. ప్రస్తుతం వాజ్‌పేయి కిడ్నీ ఒక్కటే పనిచేస్తున్నట్లు వైద్యులు తెలిపారు. 2009లో వాజ్‌పేయి స్ట్రోక్‌కు గురయ్యారు. అప్పటి నుంచి జ్ఞాపకశక్తిని కోల్పోయారు.

1996, 1999 సంవత్సరాల్లో వాజ్‌పేయి ప్రధానమంత్రిగా ఎంపికయ్యారు. ప్రధానమంత్రిగా ఐదు సంవత్సరాల (1999 – 2004) పదవీకాలం పూర్తిచేసిన తొలి కాంగ్రెస్సేతర వ్యక్తిగా వాజ్‌పేయి గుర్తింపు పొందారు. వయసు కారణంగా.. ఆరోగ్యం క్షీణించడంతో ఆయన ప్రజాజీవితానికి దూరంగా ఉంటున్నారు. గత కొంతకాలంగా ఇంటికే పరిమితమై ఉన్నారు. ఆయ‌న ఆరోగ్య ప‌రిస్దితి విష‌మించ‌డంతో బీజేపీకి సంబంధించిన కార్య‌క్ర‌మాలు పార్టీ కొత్త స‌మావేశాలు ఈ రెండు రోజులు జ‌రుప‌కుండా, పార్టీ శ్రేణులు నిర్ణ‌యం తీసుకున్నారు..