కిడారిని హ‌త్య‌ చేయించింది సొంత బావేనా.? షాకింగ్ నిజాలు బయట పెట్టిన పోలీసులు

130

అర‌కులోమావోలు చేసిన దుశ్చ‌ర్యపై ఇప్పుడు ఇంట‌రాగేష‌న్ జ‌రుగుతోంది. అరకు ఎమ్మెల్యే కిడారి సర్వేశ్వరరావు, మాజీ ఎమ్మెల్యే సివేరి సోమల హత్య కేసులో తవ్వేకొద్దీ నివ్వెరపోయే వాస్తవాలు వెల్లడవుతున్నాయి. ఓ వ్యక్తి కిడారికి అత్యంత నమ్మకస్తుడిగా ఉంటూనే ఆయనను హతమార్చడానికి మావోయిస్టులకు సహకరించినట్టు పోలీసులు దర్యాప్తులో తేలింది. అతడిచ్చిన సమాచారంతోనే మావోయిస్టుల వ్యూహం సఫలమైనట్టు గుర్తించారు. నమ్మించి గొంతుకోసిన ఆ వ్యక్తిని పోలీసులు అదుపులోకి తీసుకుని విచారించడంతో కీలక విషయాలు బయటపడుతున్నాయి. కిడారిది, ఆ వ్యక్తిది వేర్వేరు గిరిజన తెగలైనా బావా బావా.. అంటూ ఆప్యాయంగా పిలుస్తూనే ఆయన ప్రతి కదలికనూ మావోయిస్టులకు పక్కాగా చేరవేశాడు. విశాఖ జిల్లా డుంబ్రిగూడ మండలంలోని ఓ మారుమూల గ్రామానికి చెందిన ఈ నేత, సివేరి సోమకు దగ్గరి బంధువు కూడానా. ఈయన భార్య స్త్రీ, శిశు సంక్షేమ శాఖలో చిన్న ఉద్యోగం చేస్తున్నారు.

అతడితో పాటు మరికొందరిని పావులుగా ఉపయోగించుకున్న మావోయిస్టులు తమ ప్రణాళికను పక్కాగా అమలుచేసినట్టు పోలీసుల దర్యాప్తులో తేలింది. గత నాలుగు రోజులుగా భార్యభర్తలు ఇద్దర్నీ పోలీసులు విడివిడిగానూ, కలిపి ప్రశ్నించి కీలక సమాచారం రాబట్టారు. ప్రస్తుతం వీరు పోలీసుల అదుపులో ఉన్నట్టు తెలుస్తోంది. కిడారి హత్యకు రెక్కీ నిర్వహించే క్రమంలో రెండు, మూడు సార్లు లివిటిపుట్టు పరిసరాల్లో పర్యటించిన మావోయిస్టులకు అతనే ఆశ్రయం కల్పించినట్టు తెలిసింది. ఏఓబీలోని అటవీప్రాంతంలో మావోయిస్టుల స్థావరానికి వెళ్లి కలవడమే కాదు, సమీపంలోని కొందరు గ్రామస్థులతో వారికి ఆహారం సిద్ధం చేయించినట్టు గుర్తించారు. మావోయిస్టులకు ఆహారం అందజేసినట్టు అనుమానిస్తున్న వ్యక్తులను కూడా పోలీసులు విచారిస్తున్నారు.

సర్రాయిలో గ్రామదర్శినికి కార్యక్రమానికి కిడారి అరకులో బయల్దేరిన విషయం కూడా ఈ నేత ద్వారానే మావోయిస్టులకు సమాచారం అందినట్టు పోలీసులు నిర్ధారించారు. దీనికి సంబంధించి కాల్‌ డేటా విశ్లేషణలో కొన్ని కీలక ఆధారాలు లభించాయి. మరోవైపు మావోయిస్టులకు తాను ఎందుకు సహకరించాల్సి వచ్చిందో సదరు గ్రామస్థాయి నాయకుడు తెలిపినట్టు సమాచారం. సొంత మనిషిలా కిడారి నిన్ను చూసుకున్నప్పుడు మావోయిస్టులకు ఇన్ఫార్మర్‌గా ఎందుకు మారాల్సి వచ్చిందని పోలీసులు ప్రశ్నించగా వారు తనను చంపేస్తామని బెదిరించి లొంగదీసుకున్నారని అతడు బదులిచ్చినట్లు తెలిసింది.కిడారిని మావోలు బెదిరించి వదిలేస్తారని భావించానని, హతమార్చుతారనుకోలేదని పోలీసులకు వివరించాడట. అయితే, పలుసార్లు మావోయిస్టులను కలుసుకోవడం? వారికి సహకరించడం కావాలనే చేసినట్లు కనిపిస్తోంది కదా? అని పోలీసులు గుచ్చి గుచ్చి ప్రశ్నించేసరికి తెల్లమొహం వేసినట్టు విశ్వసనీయ వర్గాలు పేర్కొంటున్నాయి. మావోయిస్టుల ఉచ్చు నుంచి కిడారిని తప్పించాలనే ఉద్దేశం ఉంటే ఆయనను లివిటిపుట్టు వైపు రాకుండా ఎందుకు అడ్డుకోలేకపోయావని ప్రశ్నిస్తే అతడు నీళ్లునమిలినట్టు తెలిసింది. మొత్తానికి వీరంద‌రూ ప్రీ ప్లాన్డ్ గా చేశారా లేదా బెదిరింపుల‌కు లొంగి చేశారా అనేది మ‌రికొద్దిరోజుల్లో తేల‌నుంది.