దగ్గుబాటి రానా సమర్పించిన C/o కంచరపాలెం మూవీ రివ్యూ

658

సినిమాలు చాలానే వస్తుంటాయి.. మనసుకు హత్తుకుని మనతో పాటు జీవితాంతం గుర్తుపెట్టుకునే సినిమాలు అప్పుడప్పుడు మాత్రమే వస్తుంటాయి.. కమర్షియల్ హంగులతో గిరిగీసుకున్న తెలుగు సినిమా కంచెలను చెరిపేసే చిత్రమే ‘C/O కంచరపాలెం’. యంగ్ టాలెంటెడ్ దర్శకుడు వెంకటేశ్ మ‌హా దర్శకత్వంలో సురేష్ ప్రొడక్షన్‌లో రానా సమర్పకుడిగా విజయ ప్రవీణ నిర్మాణంలో తెరకెక్కిన ఈ చిత్రం సెప్టెంబ‌ర్ 7న (నేడు) ప్రపంచ వ్యాప్తంగా విడుదలైంది. సినిమాపై ఉన్న నమ్మకంతో హైదరాబాద్‌లో ప్రిమియర్ షోలు ముందుగానే ప్రదర్శించారు. వైజాగ్‌‌లోని ‘కంచెర‌పాలెం’ నేప‌థ్యంలో సాగే భిన్న‌మైన ప్రేమ‌క‌థ ఇది. ఈ ఏడాది న్యూయార్క్ ఫిల్మ్ ఫెస్టివ‌ల్‌కు తెలుగు నుంచి ఎంపికైన సినిమా ‘C/O కంచరపాలెం’. దర్శకుడు వెంకటేశ్ మ‌హా‌ ఈ చిత్రంతో టాలీవుడ్‌కి పరిచయం అయ్యారు.

Image result for kancharapalem posters

సుబ్బారావు, రాధ బెస్సీ, కేశవ కర్రీ, నిత్య శ్రీ, కార్తీక్‌ రత్నం, విజయ ప్రవీణ, మోహన్‌ భగత్‌, ప్రణీత పట్నాయక్‌ వీళ్లే ఈ సినిమాలో నటీనటులు. ఈ పేర్లు ఎక్కడా విన్నట్టే కాదు.. ఎక్కడా చూసినట్టు కూడా అనిపించదు. ఎందుకంటే వీళ్లంతా కొత్తవాళ్లు. వీళ్లే కాదు ఈ సినిమాలో నటించిన 52 మంది కొత్తవాళ్లే. అంతేకాదు వాళ్లందరూ ‘కంచెర‌పాలెం’ ప్రాంతవాసులే కావడం ‘C/O కంచరపాలెం’ మూవీ ప్రత్యేకత.

కథలోకి వెళ్తే.. 
కంచరపాలెం అనే ఊరిలో నాలుగు భిన్న వయస్సుల ప్రేమజంటల కథే ‘C/O కంచరపాలెం’. రాజు (సుబ్బారావు) గవర్నమెంట్ ఆఫీస్‌లో అటెండర్. 49 ఏళ్లు వచ్చినా.. పెళ్లి చేసుకోకుండా ఒంటిరిగానే ఉండిపోతాడు. అదే ఆఫీస్‌కి అధికారిగా ఒడిశా నుండి బదిలీ మీద వస్తుంది రాధ (రాధ బెస్సీ). భర్త చనిపోయిన ఆమెకు 20 ఏళ్ల కూతురు ఉంటుంది. యాభై ఏళ్లు దగ్గర పడుతున్నా రాజుకి పెళ్లి కాకపోవడంతో ఊర్లో అందరూ ఆయన గురించే మాట్లాడుతుంటారు. అదే టైమ్‌లో రాజు ప్రవర్తన నచ్చి అతని ప్రేమలో పడుతుంది రాధ.

Image result for kancharapalem posters
రెండో జంట.. జోసెఫ్ (కార్తీక్ రత్నం), భార్గవి (ప్రణీతా పట్నాయక్). జోసెఫ్ క్రిస్టియన్ టీనేజ్ కుర్రాడు. కంచరపాలెంలో అమ్మోరు జిమ్ ఓనర్‌ దగ్గర పనిచేస్తూ.. సెటిల్ మెంట్‌ల పేరుతో గొడవలకు వెళ్తుంటాడు. అనుకోకుండా బ్రాహ్మణుల అమ్మాయి భార్గవితో గొడవపడి.. ఆ తరువాత ఇద్దరూ ప్రేమలో పడతారు.

మూడో జంట.. గెడ్డం (మోహన్ భగత్), సలీమా(విజయ ప్రవీణ). అనాధ అయిన గెడ్డం కంచరపాలెం వైన్ షాప్‌లో బాయ్‌గా పనిచేస్తుంటాడు. అదే షాప్‌కి ప్రతి రోజు వచ్చి మందు కొంటుంది సలీమా అనే వేశ్య. ఆమె ముఖానికి ముసుగు కట్టుకోవడంతో కళ్లు చూసి ప్రేమిస్తాడు గెడ్డం.

నాలుగో జంట.. సుందరం (కేశవ కర్రి), సునీత (నిత్య శ్రీ). వీళ్లది చిన్ననాటి ప్రేమకథ. ఇద్దరూ ఒకే స్కూల్‌లో చదువుకుంటూ ఉంటారు. సుందరానికి సునీత అంటే చాలా ఇష్టం. ఆమెతో మాట్లాడాలని తనతో ఉండాలని ప్రయత్నిస్తాడు. సునీత ఇష్టాలనే తన ఇష్టాలుగా మార్చుకుని ఆమె కోసం పరితపిస్తాడు.

Image result for kancharapalem posters
ఇలా కంచరపాలెంలో మొదలైన సున్నిత ప్రేమకథలు కులం, మతం, ప్రాంతం, వయసు, అంతస్తుల ప్రభావంతో ఎలాంటి మలుపులు తిరిగాయి. తమ ప్రేమలను గెలిపించుకున్నారా? ఈ నాలుగు ప్రేమ జంటలకు ఒకరితో ఒకరికి సంబంధం ఏమిటి? కుల, మత సంకెళ్లను ఈ ప్రేమ జంటలు జయించాయా లేదా అన్నదే ‘C/O కంచరపాలెం’ కథ.

మహా.. మహా.. మహాద్భుతం
చిత్ర విశ్లేషణ విషయానికి వస్తే.. తొలి ప్రశంస కొత్త దర్శకుడు వెంకటేష్ మహాకే తక్కుతుంది. ఆయన రాసుకున్న పాత్రల్లో.. ప్రేమించిన అమ్మాయి వేశ్య అని తెలిసి.. కండోమ్ ప్యాకెట్‌ని చేతిలో పెట్టి జాగ్రత్త అని చెప్పే నిస్వార్ధమైన ప్రేమను వెతికిపట్టాడు. 45 ఏళ్లు దాటిన తన తల్లి.. ప్రేమలో ఉందని తెలిసి గోడ దూకించే 20 ఏళ్ళ కూతురు క్యారెక్టర్‌ని ఊహించగలమా? హీరో తెలియదు.. హీరోయిన్ తెలియదు.. పవర్ క్యాస్టింగ్ లేదు.. కమర్షియల్ హంగులు లేవు.. ఐటమ్ సాంగ్స్ ఆర్భాటాలు అంతకంటే లేవు. సినిమా మొత్తం ‘కంచరపాలెం’ అనే ఊరు కనిపిస్తుంది. అందులో నాలుగు రియస్టిక్ జీవితాలు ప్రతిబింబిస్తాయి. దర్శకుడిగా తొలిచిత్రంతోటే తెలుగు సినిమా స్థాయిని ఒక మెట్టు ఎక్కించే ప్రయోగాత్మక చిత్రం చేశారు .

‘ఏమి జన్మమూ… ఏమి జీవమూ’ అనే హరికథ పాటతో ఓపెనింగ్ సీన్‌లోనే ‘కంచరపాలెం’ ఊరి నేటివిటీని పరిచయం చేసి ప్రేక్షకుల్ని మెల్లగా కథలోకి తీసుకువెళ్లాడు దర్శకుడు. ఒక్కో పాత్రను పరిచయం చేసేందుకు కాస్త టైం తీసుకున్నా.. ఆ పాత్రలను దగ్గరుండి చూస్తున్న ఫీలింగ్ కలుగుతుంది. సినిమా చూస్తున్నంత సేపు నటిస్తున్నారా.. లేక కంచరపాలెం ఊరిని లైవ్‌లో చూపిస్తున్నారా? అన్నంతగా పాత్రల్లో ఒదిగిపోయారు. అందరూ కొత్తవాళ్లే కావడంతో అక్కడడక్కడా నాటకీయత ఉన్నట్టు అనిపించినా.. ‘కంచరపాలెం’ యాసలో అవి కొట్టుకుపోతాయి. మేకప్ లేకుండా సహజసిద్ధమైన క్యాస్ట్యూమ్స్‌తో పాత్రలకు జీవం పోశారు. రాజు, జోసెఫ్, భార్గవి, గెడ్డం, రాధ బెస్సీ, సుందరం, సునీత ఇలా ప్రతి పాత్ర కూడా ఈ సినిమాలో హీరోనే. ఫస్టాఫ్‌లో తొలి అర్ధభాగం కాస్త నెమ్మదించినా ఇంటర్వెల్‌కి ఊపందుకుంది. ఇక సెకండాఫ్‌ మొత్తం గ్రిప్పింగ్ స్క్రీన్ ప్లేతో పాత్రలతో మాయ చేశాడు మహా.

Image result for kancharapalem posters

సినిమా మొత్తం డబ్బింగ్ లేకుండా.. లైవ్ రికార్డింగ్‌తో కొత్త ప్రయోగం చేశారు దర్శకుడు. అందుకే ఆ సంభాషణలు కొత్తగా అనిపిస్తాయి. కులం, మతం, వర్గం, వర్ణం, ప్రాంతం ఇలాంటి సెన్సిటివ్ మ్యాటర్స్‌ని డీల్ చేయాలంటే చిన్న విషయం కాదు. ఈ సినిమాలో ఈ విషయాలన్నింటినీ చాలా సింపుల్‌గా ఎవర్ని నొప్పించకుండా పర్ఫెక్ట్‌గా డీల్ చేశాడు మహా.

ఇంతకు ముందు సినిమాల్లో వినని బూతులు ఈ సినిమాలో పాత్రల ద్వారా డైరెక్ట్‌గానే పలికించాడు దర్శకుడు. కాని వారి యాసలో మళ్లీ తిడితే బావుండు అనేలా ఉన్నాయి. చిన్నప్పుడు మనం చదువుకున్న పాటల పుస్తకం, వర్షంలో తలపై తాటాకు, చేతిలో సిమెంట్ బస్తా సంచితో కుట్టిన స్కూల్ బ్యాగ్, స్కూల్‌కి వెళ్లేటప్పుడు నాన్న ఇచ్చిన రెండు రూపాయలు, ఊరిలో పంచాయితీలు, తాగుబోతుల హంగామా, ముసలమ్మల ముచ్చట్లు, కాళ్లు అందకుండానే ఎగిరెగిరి తొక్కిన సైకిల్.. ఇలా సినిమాలో ఎక్కడో ఒకచోట మన జ్ఞాపకాలు వెంటాడుతూనే ఉంటాయి. ఇక సినిమా చివర్లో వచ్చే ట్విస్ట్ ప్రేక్షకుడు ఊహించని స్థాయిలో ఉంటుంది. బరువెక్కిన గుండెలతో థియేటర్ బయటకు వెళ్లాలా అనుకునే లోపే ప్రేక్షకుడి ముఖంలో చిరునవ్వులు నింపి పంపించాడు దర్శకుడు వెంకటేష్ మహా.

Image result for kancharapalem posters

మ్యూజిక్ మ్యాజిక్.. 
మణిశర్మ శిష్యుడిగా పరిశ్రమలోకి అడుగుపెట్టిన యువ సంగీత దర్శకుడు స్వీకర్ అగ‌స్తి అద్భుతమైన మ్యూజిక్‌తో సినిమా స్థాయిని పెంచారు. సంగీతం అంటే.. నాలుగైదు డ్యుయెట్స్.. ఓ ఇంట్రో.. ఓ ఐటమ్ సాంగ్ అంటూ కథను కిచిడీ చేయలేదు. ఈ సినిమాలో వచ్చే పాట కథలో లీనమై ఉంటుంది. ముఖ్యంగా ‘పట్టి పట్టి నన్నే సూత్తాంటే.. పట్టలేక ఏటో అవుతాందే’ పాట స్వయంగా స్వీకర్ అగ‌స్తి ఆలపించి మెస్మరైజ్ చేశారు. రగుకుల్ అందించిన సాహిత్యం చక్కగా కుదిరింది. ఇక సినిమాకి ప్రాణప్రదమైన నేపధ్య సంగీతంతో ఆకట్టుకున్నారు.

Image result for kancharapalem posters
టెక్నికల్ పరంగా.. ఆదిత్య జవ్వాడి అండ్ వరుణ్‌ ఛాపేకర్ సినిమాటోగ్రఫీ సినిమాకే హైలైట్. ప్రతి ప్రేమ్‌ను కథకు అనుగుణంగా వెతికిపట్టారు. లొకేషన్ల కోసం వెంపర్లాడకుండా సినిమా మొత్తంలో 80 శాతం కంచరపాలెం‌లోనే అందమైన లొకేషన్లు వెతికిపట్టి వాటిని అంతే అందంగా తెరపై ఆవిష్కరించారు. ఇక మిగిలిన 20 శాతం బ్యూటిఫికేషన్ కోసం పక్కనే ఉన్న అరకు, వైజాగ్‌ ప్రాంతాలు కనిపించినా.. అవికూడా కంచరపాలెంలో భాగంగానే చూపించారు. ఇక రవితేజ గరిజిల ఎడిటింగ్ వర్క్ బాగా కుదిరింది. పెద్ద సినిమాను రెండు గంటల 25 నిమిషాలకు కుదించి ఎక్కడా బోర్ లేకుండా కత్తెరకు బాగా పనిచెప్పారు. నాగార్జున తాళ్ల‌ప‌ల్లి సౌండ్ డిజైన్ సినిమాకు మరో ప్లస్. ఇక కమర్షియల్ హంగులతో సినిమా చూడాలనుకునే ప్రేక్షకుల్ని పక్కన పెడితే.. ‘కంచరపాలెం’ సహజత్వంతో కూడిన ఒక మంచి అనుభూతి.

చివరిగా.. ‘C/O కంచరపాలెం’ సినిమా చూసిన తరువాత సినీ దిగ్గజాల మాటలివి.
ఈ సినిమా చూసిన చాలా రోజుల వరకూ ఈ పాత్రల గురించి ఆలోచిస్తూనే ఉన్నా – రాజమౌళి
వీళ్లందరూ ఎక్కడ ఉంటారో వెళ్లి వాళ్లతో సెల్ఫీ దిగాలని ఉంది – ఎంఎం కీరవాణి
కంచరపాలెం వెళ్లి నిజంగా వీళ్ల మధ్యలో కూర్చున్నట్టుంది ఈ సినిమా – క్రిష్
ఈ సినిమా ఏడిపిస్తుంది. నవ్విస్తుంది. క్లైమాక్స్ అయితే నిజంగా ఓ అద్భుతం – సుకుమార్

రేటింగ్: 4/5

ఈ క్రింద వీడియో మీరు చూడండి