ప్రభాస్ పిటిషన్పై విచారణ హైకోర్టు కీలక ఆదేశాలు

312

రాయదుర్గం సమీపంలోని పైగా భూముల్లో ఉన్న హీరో ప్రభాస్‌కు చెందిన గెస్ట్‌హౌస్‌ను అధికారులు జప్తు చేయడంతో ఆయన హైకోర్టును ఆశ్రయించిన విషయం తెలిసిందే. శేరిలింగంపల్లి పాన్మక్త గ్రామ రెవెన్యూ పరిధిలోని సర్వే నంబరు 46లో 84 ఎకరాల 30 గుంటల భూమి ప్రభుత్వానిదేనంటూ న్యాయస్థానం మూడు నెలల కిందట తీర్పునివ్వడంతో అధికారులు ఆ స్థలంలోని నిర్మాణాలు తొలగించి దాన్ని స్వాధీనం చేసుకున్నారు. ఆ స్థలంలో ప్రభాస్‌ గెస్ట్‌హౌస్ ఉండటంతో దాన్నీ సీజ్‌ చేశారు. అయితే తనకు ఎలాంటి నోటీసులు ఇవ్వకుండా ఇల్లు సీజ్ చేయడంపై ప్రభాస్ హైకోర్టును ఆశ్రయించారు. ప్రభాస్ దాఖలు చేసిన పిటిషన్‌పై ఉమ్మడి హైకోర్టు శుక్రవారం విచారించి కొన్ని కీలక ఆదేశాలు జరీ చేసింది. మరి ఆ విషయం గురించి పూర్తీగా తెలుసుకుందామా.

Related image

తన ఆస్తి విషయంలో జోక్యం చేసుకోకుండా రెవెన్యూ అధికారులను నియంత్రించాలని ప్రభాస్ పిటిషన్ దాఖలు చేశారు. ఈ స్థలాన్ని 2005లో బి.వైష్ణవిరెడ్డి, ఉషా, బొమ్మిరెడ్డి శశాంక్‌రెడ్డిల నుంచి చట్టబద్ధంగా తాము కొనుగోలు చేశామనీ, ఈ భూమిపై ఎటువంటి వివాదాలు లేవని ప్రభాస్‌ తన పిటిషన్‌లో పేర్కొన్నారు. క్రమం తప్పకుండా ఆస్తి పన్ను, విద్యుత్‌ బిల్లులు చెల్లిస్తున్నామని తెలియజేశారు. సుప్రీంకోర్టు ఇచ్చిన తీర్పును ఆధారంగా చూపుతూ తనను ఖాళీ చేయాలని చెబుతున్నారని.. వాస్తవానికి తీర్పుతో తనకు సంబంధం లేదని వివరించారు. అసలు ఆ సుప్రీంకోర్టు తీర్పు గురించి తమకు ఏమీ తెలియదన్నారు. ఈ తీర్పును చూపించి తనను తన స్థలం నుంచి బలవంతంగా ఖాళీ చేయించేందుకు అధికారులు ప్రయత్నిస్తున్నారని ఆయన పిటిషన్‌లో పేర్కొన్నారు. అంతేకాక పిటిషనర్‌ తన వాదనలు వినడం గానీ, నోటీసు ఇవ్వడం గానీ చేయలేదన్నారు. అధికారులు సహజ న్యాయ సూత్రాలను అనుసరించలేదని తెలిపారు. అధికారుల చర్యలు తన హక్కులను హరించే విధంగా ఉన్నాయని, అందువల్ల వారిని నియంత్రించాలని ఆయన కోర్టును కోరారు.

ఈ సందర్భంగా ప్రభాస్ తరఫు లాయర్ తన వాదనలు వినిపిస్తూ.. ఎటువంటి వివాదాలు లేకపోయినా ముందు జాగ్రత్తగా ఈ భూమి క్రమబద్ధీకరణ కోసం దరఖాస్తు చేసుకున్నామని న్యాయస్థానానికి తెలిపారు. ఇందుకోసం రూ. 1.05 కోట్ల ఫీజును కూడా చెల్లించామని ఆయన వివరించారు. ఈ దరఖాస్తు ప్రస్తుతం ప్రభుత్వం వద్ద పెండింగ్ లో ఉందని పేర్కొన్నారు. రెవెన్యూ అధికారులు తమ స్థలాన్ని బలవంతంగా ఖాళీ చేయించేందుకు ప్రయత్నిస్తున్నారని ప్రభాస్ తరఫున లాయర్ వాదించారు. కేవలం సీజ్‌ మాత్రమే చేశామని, ఎలాంటి కూల్చివేతలు చేపట్టలేదని ప్రభుత్వం తరఫు న్యాయవాది కోర్టు దృష్టికి తీసుకెళ్లారు. ఈ వాదనలు విన్న ధర్మాసనం.. దీనిపై కౌంటర్ దాఖలు చేయాలని తెలంగాణ ప్రభుత్వానికి నోటీసులు జారీచేసింది. అనంతరం తదుపరి విచారణను డిసెంబరు 31కి వాయిదా వేసింది. చూడాలి డిసెంబర్ 31 రోజున తీర్పు వెల్లడిస్తుందో లేదో. మరి ఈ విషయం గురించి మీరేమంటారు. ప్రభాస్ వేసిన పిటిషన్‌ గురించి కోర్ట్ ఇచ్చిన ఆదేశాల గురించి మీ అభిప్రాయాలను మాకు కామెంట్ రూపంలో చెప్పండి.